Panasonic G1...a Micro 4/3 system digital camera

[來源：www.dcfever.com]

今日同 W 先生行旺角，佢想買部 DC 比佢女友，呢條友用開功能強橫的 DSLR，心目中當然想買部有 manual 嘅 DC 啦，不過佢女友受唔受就另一個問題喇。我哋試過幾部，都唔多啱心水，去到風擇見到我推介的 FujiFilm F100fd。好在，呢部機都無失禮，起碼 W 先生咁高要求都話過得去。

正當我哋試到興高采烈時，則邊有人影我地相喎，心諗：「頂，試機都唔好點人相丫。」望真 d，原來佢哋試緊係 Panasonic G1，第一部 Micro 4/3 相機，係雜誌都係出現左唔算太耐，居然咁快就有現貨。佢哋有佢哋試機，我哋有我哋試機，本來住佢哋放低部機就攞黎試，誰不知佢哋又玩得好興奮。之後見佢哋近距離對廣告牌閃左一下，就膽粗粗搭下訕問下佢哋剛才個一閃效果如何。一睇，OK 喎，無爆喎，即係內閃個輸出好準繩啦，估佢唔到喎。支kit鏡好小巧，感覺上大細同 Nikon 支 AF 50mm f/1.4D 差不多。Live View 方面，個 mon 清楚丫，而且個 mon 仲可以扭 270 度，個人認為咁樣個 Live View 先用得盡，高低抄都得嘛；如果個 mon 唔轉得，Live View 都只係雞肋。其實早在 prosumer 機大戰年代，扭 mon 已經好普通，至少 Nikon、Cannon、KM 都擁有呢種技術，都唔知點解唔轉移到 DSLR 上，唔通要保住單反嘅尊嚴乎？影象質尚可，唔算好sharp。之但係，只係試機，無把 file 放落電腦睇，結論唔準確。

以第一部產品來說，呢部機已經算唔錯，係開閃光燈個制做得太過緊密，手指大些都有點難按下。機仔細細，如啱女仔作升級嘅選擇，留意係佢唔算太輕。現價差不多 7000 個大洋(港幣)，著實唔算好有競爭力。功能仲有好多，當然試唔晒，有興趣可以上網睇下丫：http://www.dcfever.com/cameras/specification.php?id=1044

而家反而其望 Olympus 出年個部類似 Sigma DP-1 嘅 Micro 4/3 機，吸引力大好多。
[來源：www.dpreview.com]

觀看全文...

秋

近排涼快了不少，其實九月尾天氣開始不太熱，今年秋天比前一兩年來得早了一些。對於我這個怕熱的人來講，秋天早點到確係好事。講開秋天，就會好想聽下秋天的歌，唔……關於秋天嘅歌當然不少，之不過，以下呢兩首always on my playlist囉：

[微涼by林憶蓮]


[深秋立樓頭by徐小鳳]

觀看全文...

日走三場

今日都算係近排比較忙的一日，早、午、晚都有唔同事要做。

朝早要幫細佬續車牌，聽黎開的人講，今早算多人，平時都係十數人云云。好彩一切尚算順利，返到屋企食飯。

仙姐係楓葉國回來玩幾日，之後去日本。下晝就約左仙姐去旺角買notebook，因為先前已經幫佢搜集過一些資料，已經有target，差在見下實物。去「百魯會」睇左一陣，唔岩佢心水，再行到「風閘」，點知佢見到Asus部eeePC 1000H，就覺得唔錯，機身仲要係佢喜歡那隻色。試左一陣，又同個sales爹左兩句，得知Asus呢部會長氣過Lenovo部同級機S10，後尾睇返資料，所言非虛。1000H 雖然用Intel Atom N270 1.6GHz CUP，能力當然不能同Duel Core系列相比，但可以睇到720p的電影檔，算係咁啦，喂，四千四咋，如果要80G hard disk，四千有找添。況且，仙姐都係旅行時上下網，check下email，MSN/Skype 一下，同埋寫下Blog，其實夠用有餘。

晚上原本幫仙姐約齊佢D麻鵲腳係尖沙咀打牌，佢地打到食飯，我先一齊食。不過有個舊同事打黎話不如去食四川麻辣米線，見佢地打牌我又無野好做，而且又好想食麻辣米線喎，所以決定推仙姐，約舊同事食米線去喇。

觀看全文...

除鞋西裝友

今日坐巴士，見到呢個人仔除鞋兼啷腳。其實除鞋比對腳涼下都好平常，可以令對腳乾爽些，都好了解。不過，都唔好啷腳係對面張櫈度丫。唉……





觀看全文...

佛山遊--亞B第一次離開香港

今次襯細佬有假放，去一去佛山，帶亞B探親咁啦。亞B玩得好開心，當然吧，地方大，可以周地爬，推住櫈仔行呀行。而且各人都啺晒佢，兩個表哥又鬼死咁呵護佢喎，唔開心就怪啦。

每次到佛山，姨媽一家都會帶我們到這到那，行山呀，睇園林呀，睇古蹟呀，當然少不了食啦，有時食到唔想食添。今次有一日落雨，可以留係屋企休息下，下午留低亞B比姨媽姨丈，同表姐出去行下商場(之後才知香港也發出了黃雨警告)。第二日去過佛山郊外食午飯，之後本要去行下山的，但個天黑晒，想落雨，所以打道回佛山，表哥提議去南方古灶。這個古灶，幾年前都去過的，不過之後擴建了個陶師祖廟，連他們也未去過。古灶本身都幾大，因為之前去過，所以今次無行上去睇，只係外圍影下相就算。以前佛山石灣好多陶灶，出產好多陶瓷器皿，石灣陶瓷嘛，未去過都應該聽過掛。現在就只剩下這個灶，都算係大的一個，所以好珍貴。再者，灶上生了一棵樹，仲要唔細棵添……喂，燒陶時，內部溫度至少成千度，仲要燒幾日，外面溫度都唔會弱得去邊掛？陶灶內部就好似一條滑梯，相信溫度在滑梯頂都應該係最高，而棵樹，就生在滑梯頂外牆側。

尾二個日，去左順德，順德現在歸佛山市管轄，除了順德，三水及南海，都歸納在佛山板圖內。在順德，食下双皮奶，參觀下清暉園，行下步行街等。食双皮奶那間老字號(sorry，忘記左個寶號)，係佛山都有一間分店，前一日食過，可能加了蓮子，奶皮唔見左；順德正舖，死唔憤氣，叫了淨双皮奶，睇下有無皮。唔……有一少塊囉，丁方咁大把，仲要甜過佛山那碗，優點係平過係佛山食。清暉園係廣東四大名園之一，我到過的仲有佛山梁園。梁園好悶，可能係重建過關係，無乜古色古香，感覺比較現代。齋講景，小時去佛山中山公園，記憶中仲靚過梁園。

清暉園比我好唔同的感覺，雖然它也被擴建過，但擴建部分都以古樸風格為主，同舊那邊可以熔合，如果唔理青磚變左石屎磚，園林設計比較重石屎感外，都唔太覺得有新舊之分。另外，清暉園以往係招呼重要人物的，當他們訪問順德時，都住在清暉園，所以民革時都無受到破壞，可以保留至今。當天天氣有點熱，但又不是好熱那種，園內微風處處，又有樹木的氣味，又有淙淙流水聲，好舒服，舒服到好想坐在長櫈上睡上一兩個鐘就好了。離開順德時，到了步行街「李禧記」買了少少棋子餅同合桃酥，細佬就買了磞砂，唔錯。

由順德返回佛山，見有時間，所以唔轉車返屋企喇，改為行返去，順便去未去過的世紀公園兜過圈。世紀公園在電視塔附近，裏面有個話係全亞洲最大的陶瓷藝術品，以門字為題。外層的陶磚，由南方古灶負責燒製。遠看，其實無甚特別，每邊都是彎彎的；近看，陶磚砌出了不同的圖案，都係中西神話人物，例如古埃及的狗面人。同一個世界，同一個夢想，由同一度門打開乎？

離開佛山返香港時，忘記買番包盲公餅食，失敗……小時候，有盲公餅食都不知幾開心，人大了才少食，但每次食又會好歡喜喎，下次買盲公餅成為第一任務。

有時間，不如睇下今次影嘅相啦：



觀看全文...

「20世紀少年」電影版

小心被朋友入侵！
[來源：www.20thboys.com]

今日睇了「20世紀少年」電影版。選角方面，的確，真人版中很多都十分相似，當然不至於似到十足十，至少輪廓上都很相似，無論成人或少年。

[來源：www.20thboys.com]

故事方面，謀些場景被放棄了，但情有可原，又唔影響原本劇情發展，時間有限嘛；謀些場景則調左次序，怎至有更改，了解漫畫版的人，一定唔多習慣兼會講句：「又話唔改，改左唔少喎。」，不過又唔算好離譜，keep得番個節奏及原本個故事性。重要的是，關鍵場口都交足功課(至少我認為啦)，交代不同年代的場次都好清楚，相信第一次接觸「20世紀少年」的觀眾，應該不難掌握穿梭於不同年代的場次。

唔多講內容這樣、那樣了，反正要知，上Google又或者Yahoo!一下，都大把資料任睇。

個人覺得要彈的，係珈南竟然稱呼建次為叔叔，而不是舅父，唔止一次，係好多次。喂，家姐個女唔係應該稱呼亞媽個細佬做舅父咩！？呢個唔知係翻譯錯，撰稿錯，定配音問題喇，唉！

完場出字幕時，播著「T.Rex」的「20世紀少年」，有些人好快已經走了，但有些人如我還在看插畫。一段時間後，留下的一些人都想走的時候，突然播出建次的歌曲，那首在漫畫內被人形容為「好難聽」但好有吸引力，影響力好大的歌曲。奇怪地，想走那些人一聽到音樂的頭段，都留低喎，仲聽埋成首歌，睇埋第二集預告才離開。証明呢套漫畫，都好多fans。

第二集上影時間為2009年1月31日，相信香港會在復活節前上影。個人覺得，中集主線應該以2015年後為主，有太多連結要建立、舖排，亦有一些兒時概念要重建，可謂是一個交通點，相對地可能會無咁緊湊，依然期待。

相關連結：20世紀少年


觀看全文...

港台+NHK 的幸福味道

[來源:www.rthk.org.hk]

前兩個禮拜六，係無記睇到呢套由港台及日本NHK合作拍攝的劇集---「幸福的味道」，仲要係用高清拍攝添，唔知日後會唔會出 blu-ray 呢？

故事係講一個日本青年「哲也」，因前女友關係到左香港，與經常到外國出差的香港人「美蘭」相遇。剛巧「美蘭」的外公經營的魚蛋粉舖就快因市區重建而結業，兩人覺得這個老舖就此結業大可惜，所以決定找出和魚蛋粉匹配的湯底，甚至遠道日本向「哲也」老爸取經。故事唔複雜，不過幾好睇，而且人情味濃，好過睇埋那些一味駡、駡、駡的鬧劇。如果無野做，又想搵野攝下時間，不仿一看。不過，因為日本還未播放，直至九月廿五日為止港台網頁暫不能提供網上重溫。

《 幸福的味道》
上集簡介：http://www.rthk.org.hk/rthk/tv/soupofhappiness/20080906.html
下集簡介：http://www.rthk.org.hk/rthk/tv/soupofhappiness/20080913.html
特集網頁：http://www.rthk.org.hk/special/tasteofhappiness/

演 出：

劉心悠　　　飾演　　林美蘭 成宮寬貴　　飾演　　田尾哲也 午馬　　　　飾演　　美蘭外公 元秋　　　　飾演　　美蘭母親 塩見三省　　飾演　　哲也父親 風吹ジュン　飾演　　哲也母親 梁漢文　　　飾演　　Ray(美蘭男友) 何貴林　　　飾演　　標叔 林小湛　　　飾演　　劉女士 威利　　　　飾演　　的士司機 馬凱儀　　　飾演　　哲也女友 張堯　　　　飾演　　北京男友 黃煒琳　　　飾演　　美蘭（童年） 監製　　　：　蔡貞停、六山浩一 執行監製　：　羅志華 編導　　　：　馮家鍵、褔井充廣 編劇　　　：　陳志樺 助理編導　：　陳志恆 [來源:www.rthk.org.hk]

觀看全文...